《小朋友的興趣》

前幾天,沙律終於第一次踏上舞台表演豎琴。對於學樂器/其他興趣班我從不要求佢地達到什麼程度,最重要係佢地興趣持續。

IMG_5790.JPG

一年前在無心插柳下,沙律開始學習豎琴。當時因我覺得mini harp幾靚,於是買咗一個返屋企。沙律就自己拎起彈,佢好喜歡豎琴嘅弦聲,之後就話好想學。其實我有所保留,以前佢都要求過學小提琴及Ukulele,可能當時年紀尚小加上三分鐘熱度,冇乜心機練習,鼓勵後仍提不起興趣,學咗一段時間就冇畀佢再學。我都明白冇興趣點迫都唔會有心練,因為我小時候都嘗試過這感覺,當時我又係貪得意去學彈琴,去到中途開始發現自己成日都彈唔好,漸漸覺得練琴及上堂是苦差,興趣漸失,加上沒有人鼓勵我,所以最後放棄彈琴了,其實依家都覺得有點可惜。

IMG_5733

我明白有時小朋友好容易對新事物抱著三分熱度,而且遇上小小困難便有放棄念頭。在學豎琴前我跟沙律有個約定,現在佢稍為成長應該明白每事不能抱三分鐘熱度,我希望佢今次能認真考慮及對待,不要因一時喜歡。我亦再三強調練習時一定會遇上好多困難,好似手指痛,不可因遇上困難而輕易放棄。佢理解後依然想學,我就讓佢嘗試。每次上堂佢都好雀躍,仲成日叫我帶佢練琴。學咗幾個月,見佢依然熱愛,於是租了一部琴。初期好積極練習,但去到某個點熱情開始退減了(可以説是平台期,好似減肥咁,去到某點有點停滯不前,覺得技巧仍未掌握得好好。)我唯有鼓勵及提醒佢每樣事情都會遇到困難,要慢慢克服及嘗試揾方法改進,經過一段時間加上老師教導,佢技巧掌握又真的比之前進步了,歌彈得越來越好,佢又開始提起興趣,每天主動練習, 彈琴好似成為佢放鬆心情其中一個方式。幾個月前老師鼓勵佢參加今次的表演,成為更大推動力,雖然呢幾個月花多少少時間練習,但佢超級期待是次表演。

IMG_5791

第一次表演,估不到可以成為其中一位Outstanding Performance 得獎者,這個獎對佢係一個鼓舞,亦將佢對豎琴熱情提升,希望佢團火會繼續。表演中見到好多大姐姐、大哥哥出色琴技,佢地每位都好enjoy好投入。我相信學樂器/其他興趣必要條件係小朋友有興趣及令興趣持續下去,當遇上平台期加以鼓勵。如果鼓勵過後,小朋友仍提不起興趣,我想家長如何迫也沒用。

 

《增加爸爸跟小朋友獨處時間👨‍👧‍👧》

27540958_2012389065646232_3206791070932374332_n

每個第一次做母親都會好緊張,所有照顧BB的事都想自己一手一腳包辦,我都不例外。雖則我老公都會幫忙,但永遠都有我看不過眼的事情,覺得佢照顧得不夠細心呵護,例如:餵奶冇耐性🍼,換片搞到漏尿漏💩、沖涼又好似沖得唔乾淨🛁,總之有啲甩漏。

初初我都忍不住自己做返,好多時出街約朋友都帶住沙律。不過帶住小朋友有時都幾難暢所欲言🗣,尤其當時我好多朋友未生更難理解。後期見沙律長大了,相對初生嬰兒容易照顧,我就嘗試放低沙律畀老公幾個小時,等佢可以跟沙律獨處兼培養親子時間,你問我擔唔擔心?我都驚佢冇做足我嘅吩咐,但諗深一層老公咁大個人冇理由質疑佢嘅能力,佢平時做事有文有路,最多係換片換得唔好,件衫調轉著等,試過幾次見沙律冇穿冇爛,而且爸爸也有權跟小朋友單獨相處空間,我開始學識放鬆。😬 到有雜果,我初初也不會讓老公單獨睇兩個,直到雜果大啲,沙律又懂性,我再次放手。

當上全職媽媽後,雜果沙律更黐我,試過兩個爭住話第時要餵我食飯照顧我,咁爸爸呢?👱🏼‍♂️我平時也灌輸佢地要孝順爸爸,爸爸好辛苦返工養我地㗎。不過始終我陪佢地時間相對多,所以我依家都製造更多機會畀佢地相處👨‍👧‍👧,始終親子關係是由兒時建立。除咗我間中約人去街,平日老公早放都讓老公帶佢地去玩下,增加溝通。我唔希望兩個女太一面倒黐我(雖然我心裏偷笑🤣),但亦要顧及老公感受,不想佢被疏忽,亦希望我地一家親子關係健健康康!👍🏻

 

《如果孩子與你期望有落差,你會支持孩子做自己嗎?》

當大家打算有小朋友👶一刻開始,會否已為佢哋設定一些期望💡? 如果小朋友未能達到你嘅期望💡,你會否同樣支持佢哋呢💪?

Photo A

最近,你哋有冇見到美贊臣Enfinitas 《魔法天資》嘅短片🎥呢? 較早前我參加咗短片試影會, 片段講述一個小女孩👯天生性格特別, 行為怪異, 令其父母摸不著頭💢。 最後其父母放下俗世眼光, 走進小女孩👯嘅世界,發現背後原因源於小女孩有着豐富想像力。當了解後, 其父母選擇支持並鼓勵小女孩發揮獨有天資。

Photo C

Photo F

回想以前, 我父母👪一直為我將來鋪路, 我亦乖乖地按住佢哋安排嘅路行。 你問我這是否我想行嘅路? 或者咁講, 畢業後我做咗大家所講嘅 “專業人士”, 呢條路我行得算平坦, 但有時我都會幻想如我沒跟隨這條路, 或向我興趣發展, 我會否在叧一片天空🌈又更突出嘅表現呢?

Photo G

到我有了下一代, 我最初對雜果沙律也不寄予太高期望, 只要孝順父母丶品行良好便可。 不過當實實在在養育一個小朋友👶時, 自自然會為佢哋鋪排一條我哋認為合適佢哋, 而且符合我哋要求嘅路。 大家都知沙律天性固執掘強, 不容易妥協, 所以好多時佢都會跟我期望有所落差。 初時,我真的好勞氣😤! 我認為我所做的都是最好,為何唔領情? 我開始反思, 明白小朋友係一個獨立個體, 有自己嘅想法💡, 有啲嘢係無得迫。 我逐漸學習放手及讓佢哋選擇, 並且支持佢哋。

睇完美贊臣《魔法天資》短片🎥, 跟在場專家和其他媽咪分享感受,我更覺得需要💯%支持雜果沙律做自己。 專家話父母平時應多觀察🔍小朋友嘅特性,幫佢哋發揮所長。 父母不應該因為世俗眼光或者自己嘅枷鎖,抹煞小朋友嘅特點。 父母應欣賞小朋友嘅長處,就算小朋友天資未見明顯突出,我哋都可以從佢哋興趣着手,話唔定佢哋將來可以係呢方面有好好的發展。 我自己一直都有留意雜果沙律嘅喜好和特點。 好似沙律,佢對畫畫🎨做手工好有興趣,我讓佢空閒時間自由發揮, 帶佢參觀跟藝術有關嘅展覽,又買相關嘅書,甚至一齊畫畫🎨做手工,我發現佢畫嘅畫越來越靚。如果佢哋將來想係哪一方面發展,只要唔係做壞事, 我一定會💯%支持及鼓勵佢,因為呢個係佢哋嘅人生,佢哋亦都有權選擇。

Photo E

Photo D

Photo B

如果大家仲未睇美贊臣Enfinitas 《魔法天資》嘅短片🎥, 可以click入以下video link睇一睇(
https://www.facebook.com/enfinitashk/videos/1004743746324037/), 我相信你會對培養孩子的想法有另一番體會😁

 

《小鼓勵》

呢份係我送比沙律的小小禮物🎁!作為給沙律的小鼓勵!今次沙律測驗再有少少躍進, 尤其數學及常識。佢好雀躍, 我都替她興奮😄。

一直以來沙律都係令我特别擔憂, 無論性格、健康、學業等,不過做啊媽就會找遍、想盡方法幫助佢。沙律可能不是天資聰敏, 但佢有固執堅持嘅性格,經過之前嘅跌倒, 佢仍然堅强撑過去, 而且一次比一次有改進。沙律開始將急進性格改變, 接納他人意見, 我亦在旁不停讚賞她的改變及鼓勵她。我從没想過要她考什麽名次, 但只希望她每次都可以從上次經歴學習反思作出少少改進便可。加油沙律!💪
另外, 我都很感恩佢遇到一班一直給予鼓勵的老師, 作為成績一般的學生得到老師的認同來得更有意義。希望佢之後仍可遇到更多好老師。

《餵母乳的經歷》

最近睇到朋友share呢條片, 可能大家都睇過, 好touching! 睇到呢條片讓我勾起生完沙律後餵母乳嘅經歷。記得每朝一早起身埋身餵奶, 然後趕住返工。咁啱放完假返工就係Year end, 工作量較多, 連飲多杯水都無時間, 我只可以襯食午飯時間去泵奶, 當脹奶真係好辛苦, 但又忙,唯有忍住。

最慘公司無地方泵奶, 唯有係洗手間, 其實都怕唔衞生。我亦唔理其他人入洗手間, 照泵啦! 好彩同事都體諒嘅!每次泵奶都要花幾十分鐘先得少少, 但我希望盡努力為囡囡泵得幾多得幾多。 不過有時好尷尬, 將啲母乳放入雪櫃, 走嘅時間最怕被男同事見到我拎啲奶…我公司離屋企唔算太遠,所以放工就即刻返屋企泵奶,之後食飯又餵奶,瞓前再餵。 我諗我果時無時間飲水,同埋太忙又有壓力, 所以最後只可以捱多個幾月。雖然好辛苦, 但為咗囡囡一切都值得。

我都好佩服幾位在職媽媽朋友可以堅持餵母乳至一兩歲嘅精神, 同埋公司嘅配合實在好緊要,我知而家好多有規模嘅公司已有泵奶房。希望小型的公司也能有一個小小的泵奶房給在職媽媽,呢個真係必需。

女人多自在 5 : 無條件(片段)

https://youtu.be/i2aL0BOjiv8

《讓孩子主動讀書的習慣》

13087922_1738690936349381_4604748988992184554_n

好耐無寫過關於育兒嘅topic, 今次就講下我大女沙律讀書遇到的困難吧! 之前我係一個訪問中講過沙律由細到大都係最令我懊惱嘅, 首先佢小時候性格非常屈強, 到現在稍有改進。不過佢入咗小學後, 我又發現另一問題, 佢時常未能專注及認真理解題目, 成日好似唔想諗, 搞到我都幾忟同煩惱。

一兩個月前我覺得要正視下, 雖然老師話佢唔大問題, 好多小朋友都係咁, 但學習係要訓練思考而唔係死讀書, 長此下去可能會影響佢學習習慣, 所以我好希望盡早糾正佢的態度。

現今教育制度某程度令小朋友失去讀書主動性,但我睇完呢本書《讓孩子主動讀書的37個習慣》後發現好多時我地作為父母也會不自覺地跌入某些陷阱而令小朋友失去主動學習嘅動力。 其中我成日講”快啲啦!快啲做!” 原來會令小朋友唔再深入思考題目,我從無諗過我某些説話或行為會影響佢, 做父母梗係想佢快啲做完有時間輕鬆下, 點知會害咗佢。而家我開始嘗試用唔同方法引導佢睇清楚再認真地諗, 唔再係咁催佢, 如果唔識我最多逐步逐步比tips佢諗。另外又陪佢玩多啲用腦嘅遊戲和睇IQ書 , 希望培養佢肯用下個腦思考。仲有我亦用獎勵計劃鼓勵佢認真思考題目, 連同行為獎勵計劃儲夠星星就可以換禮物。希望有一天佢呢個問題可以好似佢屈強嘅性格慢慢有所改善啦! 書中亦提及咗好多方法如何養成小朋友有主動讀書嘅習慣, 我都在試行中(但有時唔係一朝一夕可以做得到)。

做啊媽真係養兒一百歲, 長憂九十九!

《第一次接受報章訪問 ~ 全職媽媽的苦與樂》

最近接受咗HK01報章訪問, 第一次訪問都有點緊張…哈哈! 😁😁😁

12933097_1726519894233152_1866211286670940644_n12472267_1726519907566484_4497071101310354443_n

12931229_1726519947566480_1203148277015616970_n

訪問中主要分享做全職媽媽的苦與樂。以前都分享過我為何由在職媽媽轉為全職媽媽,你問我有無後悔? 係呢刻我仍會回答”我沒有”,雖然我放棄了一份專業人士嘅工作, 但我可以每天陪伴雜果沙律成長, 呢樣嘢係無價, 尤其可以即時教導及提點,我認為可慢慢教育她們及改善她們的品行也是很值得。
當然做全職媽媽並非易事, 但我相信做每一份工作或崗位也有其難處及壓力。如果你問我, 我反而覺得返工壓力更大, 因為要向好多人交代及職場上複雜的辦公室政治。然而, 全職媽媽只需向自己丶丈夫及小朋友交代, 唔夠完美也不會擔心其他人的目光, 只要家裏的丈夫及家人懂得感激體諒和欣賞, 做全職媽媽也會甘心和值得。咁我會否重返職場?其實間中也有agent問我會唔會有意做返嘢,不過我都係同佢地講我未有此諗法,可能要等雜果沙律大少少,有獨立能力時,而又有公司請我的話,或許我會考慮下。
記得曾經有朋友問我做全職媽媽會否好悶? 我又唔覺得, 因為只要識得安排時間,平衡自己的生活(例如:有自己嘅興趣丶閒時放下子女與好友相聚丶抽時間與老公二人世界), 不斷增值自己, 跟住社會的步速, 如有時間更可以去義工幫助有需要的人,這樣的生活已經是相當多姿多采, 而且也不會與社會脫節。講真我自己也見過好多活得精彩和正面嘅全職媽媽,佢地大部份嘅共通點都係識得為自己安排時間及揾興趣。
不過, 是否要成為全職媽媽是取決於每個人的感受及需要,可能有些人會覺得全職媽媽好大壓力, 沒有私人空間等,所以一切都應由自己內心需要做一個合適的決擇,不要因外人的眼光而迫自己做一些覺得唔舒服的事情,永遠只有你才知自己需要什麼。

12891535_1726519920899816_2121496738899425130_o

全文: http://www.hk01.com/好生活/14006/-親子專題-全職媽媽唔易做-媽媽-壓力大過返工-

物質vs親子時間

11831741_1654869908064818_4410803814641348703_n

以下係最近與兩女兒閒談中的對話。

我問兩個囡囡:「不如媽媽返工,好不好?」

兩個囡囡異口同聲答:「唔要!一定唔可以。」

我又說:「媽媽返工可以有多點錢買好多好靚嘅玩具和衫。」

大女猶豫了一陣説:「咁你可以返工,不過你只可返十天同埋每日返幾個鐘,之後就要陪我。」

細女就話:「唔可以,我唔鐘意。」

我又問:「點解唔比我返工?」

佢哋回答:「因為想你陪。」

記得大女兩歲前我每天上班,回家時見到女兒悶悶的自己玩,當見到我地回家時即刻雀躍起來,有時都會覺得陪佢的時間少,平日每日只有兩三小時陪佢(連食晚飯)。可能自己陪佢時間少,變相有少許寵佢。自己返工見唔到佢,食午餐時會去睇小朋友嘅玩具或衫,以前真係好捨得買,就算有點貴也不太計較。現在回想大女當時不夠兩歲,其實佢不是需要呢d物質,佢需要嘅係我地嘅時間。

我都明白大女經歷過我地返咗工後得佢自己同工人姐姐係屋企嘅心情,當時又未有妹妹陪,所以覺得好苦悶。現在有時兩個囡囡也會投訴爸爸成日没有時間陪佢,或許係呢個香港社會有時想平衡各方太不容易。 其實作為家長唔應該因歉疚心而不斷利用物質填補小朋友嘅心靈,這樣可能令我們下一代會更加不懂珍惜,尤其小朋友細的時候需要的是我們的陪伴。 我曾見過有父母好捨得,可以一次買好多玩具文具比小朋友,從他們口中也聽出小朋友如何不珍惜擁有的東西,但是他們依然繼續給予物質。

現在我亦時常提自己要忍手呀,唔好買咁多嘢比佢地,玩具大部分係親戚朋友送(簡中買一兩件),較靚嘅衫就係生日及節慶才買一兩件,反而我現在覺得教育及心靈培育才係對小朋友最重要。

註:相片攝於2014年,簡單在大片草地跟我們跑,兩個妹妹已經好開心,小朋友的需求其實好簡單。

做全職媽媽是得還是失?

11825545_1656794097872399_3506711497736901214_n

最近與幾位舊同事相聚,其中一位係媽咪,佢有兩個小朋友,分別七歲及四歲。由於某一件事情令佢有辭職的想法,當然有一些方法可以解決這事情。不過佢又覺得自己工作與家庭方面都未能兼顧得很好,工作上亦未能給予很大的成功感,家庭方面平日陪伴小朋友時間太少,每天放工回家已8點,小朋友亦在做功課或玩,而兩公婆才開始食晚飯,食飽後又要趕快安頓小朋友睡覺,根本沒有太多時間溝通,甚至不能即時教導小朋友功課上難題。 佢的心情十五十六,一來擔心將來小朋友大點再揾工有點困難,二來她的付出係咪值得。其他同事都覺得佢應該辭職,這樣對小朋友成長有好處多於壞處。

佢也問我究竟當全職媽媽係得還是失?呢刻我依然會答得多過失,我相信我不會後悔。工作的而且確可以給予我金錢及少許滿足感,我以前工作遇到嘅人和事都算ok, 而且都算一帆風順。我與朋友有同一感覺,要兼顧工作及家庭係唔容易,好多時會感覺自己兩頭唔到岸,工作未必能100%投入,家庭小朋友方面又未能照顧及教導周到,呢種感覺都幾挣扎和有自責感(無論對公司及小朋友)。

當上全職媽媽,係有好多令你憤怒的時刻,不過每天陪住小朋友經歷嘅點點滴滴其實係甜在心頭,呢種感覺我從來未試過係工作上遇到,亦非筆墨可以形容,要親身經歷才能體會。有時我反覺時間過得太快,尤其對大女我也後悔錯失陪伴佢頭兩年的時光,好多嘢過咗去已不能追回來。我好慶幸我仍有第二次機會及老公的支持,現在可以每天陪伴佢地,無所不談,有時佢地未講我已知道佢要乜想做乜,這點小小的事足以見証我付出是值得。

正如我以前所講,全職媽媽也要建立自己嘅朋友圈子、興趣和不要比自己out,就算將來小朋友長大後不再需要呢位全職媽媽也不會有太大失落感。我和其他同事建議朋友就算做咗全職媽媽都要增值自己,尤其我呢位朋友讀書叻,可以係呢段時間再進修一下,雖然未必能將學到的即時應用,但可能有一天可以大派用場呢!

我朋友最終會如何選擇我未知,不竟這也是每人的選擇,每人對各方面的需要和感覺也不同。在我心中,我唔會因為自己係全職媽咪而覺得自己係一個無價值的人和看低自己,反而覺得我的生命活得有更意思和精彩。

Taken by King’s production

一定要生仔?

J-0035

昨日睇咗一篇報導話一位老公欲追生仔而其老婆以經濟原因而拒絕後,老公就對老婆動粗及最後引致警察到場解決問題。睇完呢篇報導後我真的唔明呢個年代仲有咁多人仲咁唔開明?

我有兩個女,好多時成日就會被人追問會否生仔?難道沒有生仔就係千古罪人?會遺憾終生?我覺得呢個年代嘅女性唔應該將呢樣嘢變成一個𣕧鎖,我同老公未生前已商討無論男女都只會生兩個,之前我亦講過懷孕到生都唔係最辛苦,而係教養小朋友才是一門學問,如果自己生咁多又唔可以教育好佢,為何只為傳宗接代而生育?

曾經有朋友問我會否去其他國家接受人工受孕並選擇性別,我話我唔會。首先我還有生育能力,無須因為性別而揀人工受孕。第二,如果老公因為我無生仔為藉口而揾小三,我覺得呢個人亦無需留戀。其實眼見好多就算老婆有仔,個老公都會有小三,所以唔係生咗個仔=老公唔揾小三。如果老公堅持生仔,咁樣我覺得佢只當老婆係生仔機器。第三,我覺得男或女都係上天賜比自己嘅禮物,有時強求也未必係一件好事。其實無論男女都係自己骨肉,點解因為迂腐思想影響夫妻關係?

我嘅爺爺係好傳統一定要生仔嘅人,佢有十幾個孩子(男女各一半),佢最希望有人幫佢開枝散葉。雖然有好多仔,但最終得我爸爸幫佢散葉,而我弟弟會否為佢開枝散葉佢都已睇不到了。根本傳宗接代並非可操縱於你手,唔係話生咗仔就成個家族可以順利延續下去,如果個仔或孫唔生,傳宗接代亦不會繼續,所以不需將責任歸咎於自己,有時做人唔好太執著,尤其呢個世代大家唔好再因呢d咁迂腐思想影響自己!

Taken by King’s production