本來諗住復活節時去名古屋玩, 但由於驗身報告搞到無嘥mood,最後原來沒有大礙, 於是即刻訂四月份機票去日本賞櫻。遇啱平日返學時間, 所以沙律今次無份去了(佢初初都唔肯, 不過同佢解釋以前妹妹六個月時我地都無帶妹妹去英國旅行, 所以今次帶返妹妹都算公平喎, 最後佢先平伏心情)。
今次旅程除咗去名古屋外, 我地仲去昇龍道某幾個地方, 包括: 下呂丶金澤丶高山及富山, 但短短七天確實唔夠玩睇唔夠, 有好多地方真係好想去。
雖然算遲訂機票, 但好彩都訂到早機去晚機返, 而且係直航, 可以慳返啲時間。
雜果好開心可以再去日本玩, 佢心諗好快可以見麵包超人啦!
經過三小時多嘅機程, 終於到達名古屋啦! 機場見到昇龍道嘅介紹, 梗係影相留念下。好興奮, 好希望順利去到所有景點同睇到櫻花盛放啦!
第一時間要撘車出市區去酒店check in 先，我地酒店係榮站附近, 本身有機場巴士直接去到我地酒店, 但我地啱啱趕唔到3點幾個班, 要等成個幾鐘, 所以要坐名鉄空港缐再𨍭車到榮站。
我地坐名鉄空港缐特急嘅普通席去金山站轉名城線到榮(大概1小時), 榮站出口12, 然後行10分鐘左右到達我地名古屋嘅酒店~Nagoya Tokyu Hotel。
選擇Nagoya Tokyu Hotel係因為老公去日本出trip都住呢個集團嘅酒店, 佢儲咗一堆分, 而佢又係榮站附近, 所以決定用佢啲分換埋房。酒店係大型, 普通房間都大間, 而且算新正, 乾淨企理,之後返名古屋兩晚都會再入住呢間酒店。
Double Room, 係日本嚟講房間丶床鋪算大
Nagoya Tokyu Hotel
地址: 愛知県名古屋市中区栄4-6-8
電話:052-251-2411
網站: www.nagoya-h.tokyuhotels.co.jp/ja/index.html
地圖
放好行李後, 我地就去酒店附近的松坂屋行, 因為我地第一個任務係要幫雜果揾Magical Pod電話, 因為之前買咗一個比家姐, 覺得好好玩, 如果兩姊妹都有, 仲可以互send message, 所以去松坂屋𥚃嘅Yodabashi揾下有無, 點知揾唔到。
Yodabashi
地址: 愛知県名古屋市 中区栄3−16−1
電話:052 265 1010
營業時間: 10a.m-10p.m
地圖
原來Disney Store都係在松坂屋裏, 於是就去逛一逛睇下有乜得意嘢。雜果見到當然瘋狂啦, 樣樣都話靚, 我地就快暈。不過我就係度見到好靚嘅Disney公仔筷子, 所以買比大家做小禮物。
Source: http://www.disney.co.jp/store/storeinfo/115.html
Disney Store
地址: 愛知県名古屋市 中区栄3−16−1, 松坂屋名古屋本店本館5F
電話: 052 242 8511
營業時間: 10a.m-7:30p.m
之後就趕去名古屋站嘅Bic Camera睇下有無Magical Pod同埋幫朋友買嘢。最後我地見唔到部電話, 只係買咗條有聲有光嘅Elsa裙比雜果。我相信小朋友去Yodabashi同Bic Camera嘅玩具部最開心，日本買玩具真係平好多, 所以點都買咗少少返香港。
Source: http://www.biccamera.co.jp/shoplist/shop-033.html
BIC Camera
地址: 愛知県名古屋市中村区椿町6-9
電話: 052 459 1111
營業時間: 10a.m-9p.m
網站: www.biccamera.co.jp/shopguide/index.html
地圖
行完街就去食名古屋名物~特大炸蝦! 佢就係Bic Camera附近嘅Esca新龫線地下街。
Esca地下街23號舖
全部都係炸蝦, 有好多款式。
炸蝦有幾長? 35cm, 好長! 仲要用剪刀剪開食。
雜果見到咁大隻蝦都好出奇! 當然要係舖內嘅巨型炸蝦影張相啦!
我就食呢款春季限定, 整體我覺得味道一般, 又未致於非常好食, 都係gimmick嘢!
順道試埋名古屋名物炸雞翼, 加枝啤酒 (咦, 我唔係係韓國喎!)
海老食堂 (ESCA)
地址: 愛知県 名古屋市中村区椿町6-9 エスカ地下街 (23號舖)
電話: 052 459 5517
營業時間: 11a.m-10p.m
地圖
Source: http://www.esca-sc.com/sg_rest_cafe.html
食完就返酒酒店, 雜果即刻著Elsa裙上身, 超興奮!
而我地都要早瞓, 因為第二日就要揸車去高山玩, 好期待!
