第四日, 好期待! 夜晚去食醬油蟹啊! 好嘢!
咁朝早去邊? 我去首爾前發現其中一個電視台MBC開咗個Theme Park叫”MBC World”, 好似係2015年九月開, 新嘢? 我梗係去試玩下啦! 由於MBC World都有好多嘢講, 所以我將第四天分兩part講啦!
MBC World係位於數碼媒體城站, 我地係首爾站坐機場鐡路, 上車時等咗好耐, 怕搭錯車我地都攞個站名當地人係咪搭啱車, 好彩無錯。到數碼媒體城站落車, 然後九號出口行大概10分鐘, 行行下會見到好多媒體公司, 一個好新嘅數碼媒體城, 有點似科學園feel。
數碼媒體城站9號出口
數碼媒體城站9號出口地面
對面就係MBC
MBC入面環境好新
MBC其中一個藝術品
未夠時間, 四周影下相
見到MBC個名就入去, 入面應該有電視辦公大樓, 中庭也有不少藝術品, 而MBC World就係明星公園附近(有幾位韓星紙版公仔係度)。MBC分三個Zone, (M Zone, B Zone及C Zone), M Zone 及 B Zone係同一座大樓裏(入場券可於此大樓購買), 而 C Zone係對面。由於我地遲咗起身, 去到已11點幾, 第三場11:00過咗要等13:30果場, 唯有去參觀下MBC及食飯先。MBC四周環境好舒服, 我地又去明星街道睇下有乜韓星手印。
MBC World
MBC World出面有好多韓國明星嘅紙版公仔
見到School food老公話去食, 我話去到韓國又食School food, 講真韓國School food係好食d同平好多, 算啦!
School Food (點解去韓國仲食㗎?)
不過我好喜愛韓式辣麵, 比香港的彈牙d
紫菜卷
好大塊牛排, 抵過香港
飲杯特飲
差唔多時間, 我地去買入場券先, 成人W18,000, 學生W13,000,小童W9,000。
票務處對面
票務處
首先去M Zone玩, 一入去係”名譽殿堂”, 主要介紹MBC嘅歷史及經典。
MBC歷史
MBC歷史
近年嘅MBC
之後就玩”全息劇場”, 就算你唔識韓星, 你一定識唱”Gangnam Style”嘅PSY, 呢度可以透過螢幕欣賞PSY, BIGBANG 及2NE1表演勁歌熱舞, 最正係唔使戴3D眼鏡已感受到佢地好似係現場為我地表現, 推介!
(圖片來源: http://mbcworld.imbc.com/chn/)
影得唔清楚, 2NE1正為我地表演, 我都想跟住跳
出到嚟可以與不同MBC劇集嘅演員影海報或著上不同戲服, 係對住個Mon, 任你揀衫及配飾, 都幾得意。恕我唔識所有韓星, 劇集中我只識演”星星”的金秀賢, 咁我揀咗佢套”擁抱太陽的月亮”影海報啦! 影完仲可以send去你私人email做紀念。咁啱有個靚仔Oppa(職員), 佢識英文於是帶我地遊M Zone。
Fitting Room 及 My Drama Poster
較啱角度, 揀自己想要嘅嘢就得
掂咗, 就send 去我email
然後就嚟個”舞蹈體驗”, 踏上舞台偶像組合會通過熒幕教我地跳舞舞步, 雖然學過Funky Dance(跳K-pop歌), 但真係好難跟…哈哈! 似玩跳舞機, 但多d舞台效果, 好玩!
準備接受挑戰
好正! 好好玩! 如果雜果沙律一定發癲!
跟住可以嘗試做主播”新聞體驗”, 靚仔Oppa比咗中文稿我, 我就跟住讀, 不過簡體字和字幕轉得太快, 我口齒唔伶俐跟得辛苦, 好好的體驗。
好認真! 哈哈!
我做咗韓國”主播”啊! Yeah!
如有留意Samsung產品都知佢地有部VR機, MBC World就係可以戴上呢部機體驗虛擬世界, 佢有唔同類型節目你揀, 我選咗跳舞, 頭隨時向上下左右移動, 影片都跟住移動, 好得意, 好新穎, 不過郁得太快同睇得耐會好攰。靚仔Oppa仲同我老公講有靚女片睇…
體驗VR
去到M Zone最後可以通過熒幕寫上留言給MBC, 此留言也可send去自己email。
(圖片來源: http://mbcworld.imbc.com/chn/)
靚仔Oppa又帶我地去4/F嘅”史劇體驗”, 一出lift就見到李英愛”大長今”造型及立體背景，當然要拍照留念。館內也有其他MBC古裝劇集中主角造型及背景，又有古裝劇集嘅戲服。
李英愛嘅大長金!
古裝劇的戲服
擁抱太陽的月亮
去到盡頭有個皇帝位, 用自己張入場券就可以玩遊戲，大家要跟住電視指示做動作, 電視熒幕會有自己同電視入面嘅演員一齊出現, 原來玩完所有遊戲可以print返張A4紙睇自己玩遊戲嘅相，鐘意可以將某些相購買作紀念, 好過癮!
呢個又係好搞笑,幾得意!
最後靚仔Oppa送我地離開M Zone, 我地就去隔離嘅B Zone, 呢度係3D畫廊, 全部都係MBC嘅劇集同節目, 我同老公係每張圖擺唔同姿勢…好搞笑!
B Zone入口
唔同韓劇及綜合節目嘅立體畫, 大家可以擺不同pose
C Zone係對面大廈, 呢邊主要係MBC嘅節目體驗, 包括: 我們結婚了、我是歌手、蒙面歌王等。
“我們結婚了”就係坐係梳化望住熒幕, 靚仔或靚女韓星會出嚟同你sweet sweet。
我就同G-Dragon sweet sweet…哈哈!
“我是歌手”可以一嘗做歌手, 入去錄音室歌手會帶住你唱歌, 而且佢會錄起你的歌聲, 可惜我果時未學韓文, 唔係可以唱好d。
好緊張, 第一次錄音…獻醜啦!
“我的小電視”就可以同歌星一齊擺pose影相
我就同PSY影相,好神氣!
“蒙面歌王” 可體驗明星各種妝容, 有d似化妝apps。
上完妝啦! 影相留念! 下次可以試d激d嘅妝玩下, 又唔使落妝
“明星商務車”可以與明星一切坐車周圍去, 覺得一般。
終於差唔多玩完, 真係體驗好多新科技, 好好玩，建議識多d韓星會更好玩投入。
原來完成所有遊戲機可睇返之前玩時拍下嘅相, 我就影底嘥。
臨走去票務處可print呢張A4紙, 有各遊戲嘅精華照片, 有興趣可以購買整不同紀念品。
MBC World
地址: 首爾市麻浦區城岩路267 (數碼媒體城站落車, 然後九號出口行大概10分鐘)
電話: 02 789-3705
營業時間:由早上10:00-18:00(一天有9場,最後一場為16:00, 每隔30分鐘一場, 全程參觀時間為90分鐘~official咁講, 但我玩多過呢個時間)。註:12:30~13:30午飯時間, 不能入場。
網站: http://mbcworld.imbc.com/chn/index.html
地圖:
(圖片來源: http://mbcworld.imbc.com/chn/)
大概3:30左右離開MBC World準備去江南區, 下次繼續講埋第四天嘅行程比大家啦!
